यस वर्ष क–कसले पाए म्युजिक खबर अवार्ड ?

काठमाडौं । छैटौँ म्युजिक खबर म्युजिक अवार्ड सम्पन्न हुँदै गर्दा गायिका जुना प्रसाईं र गायक रामकृष्ण ढकाल उत्कृष्ट गायक गायिका बन्न सफल भए ।

जुनाले नजरमा तिम्रो गीतबाट अवार्ड चुम्न सफल भएकी हुन् भने रामकृष्णले म लडेको मात्र गीतबाट अवार्ड चुमेका हुन् भने डाँडैमा विजुली बोलको लोकदोहोरीले नवगायिका कल्पना सुनुवार, निर्देशक प्रकाश भट्ट र पपुलर अवार्ड शंकर बिसीले चुम्दै ह्याट्रिक गर्न सफल भयो ।

समारोहमा लोक, पप, आधुनिक, चलचित्र, संगीत, म्युजिक भिडियो अभिनय, नवप्रतिभालगायतका विभिन्न ३४ विधामा अवार्ड प्रदान गरिएको थियो ।

म्युजिक खबर डटकमको आयोजनामा हुँदै आएको अवार्ड समारोहमा वरिष्ठ गीतकार रत्नशमशेर थापालाई २५ हजार पाँच सय ५५ नगद राशिसहित म्युजिक खबर दीर्घसाधना सम्मान प्रदान गरियो ।

कार्यक्रममा म्युजिक खबर दशक श्रष्टा सम्मान गायक शिशिर योगी र गायिका सत्यकला राईलाई प्रदान गरियो । त्यसैगरी, बालप्रतिभा प्रोत्साहन सम्मान बालगायक बेगेन्द्र बुढाले प्राप्त गरे ।

म्युजिक खबर डायस्पोरा संगीत सम्मानबाट गायक बुद्धिमान घिसिङलाई सम्मानित गरियो । पाँच हजार पाँच सय ५५ नगद राशिको म्युजिक खबर संगीत पत्रकारिता पुरस्कार डा. नवराज लम्साललाई प्रदान गरियो । म्युजिक खबर युवा प्रतिभा पुरस्कारबाट पदमबहादुर रोकाया सम्मानित भए ।

राष्ट्रिय नाचघर, जमलमा आयोजित अवार्ड कार्यक्रममा गृहमन्त्री शर्माले गीत–संगीतमा निकै शक्ति रहेको धारणा राखे । उनले गीत–संगीत राजनीतिभन्दा माथि रहेको बताउँदै राष्ट्रभक्तिमा उत्साह जगाउने अभियानमा गीत–संगीतले ठूलो भूमिका खेल्ने दाबी गरे ।

देशको कला, संस्कृतिलाई उजागर गर्न कलाकारले गरिरहेको योगदान अतुलनीय रहेको उनले बताए । विभिन्न कलाकारले गीत तथा नृत्य प्रस्तुत गरेर रौनक बढाएको कार्यक्रममा संगीतकर्मीको बाक्लो उपस्थिति थियो ।

विगतका वर्षमा झैँ आफूहरूले यसपालि पनि अवार्ड प्रदान कार्य भव्यताका साथ सम्पन्न गरेको अवार्ड आयोजक संस्थाका प्रमुख सुमन वैरागीको दाबी छ ।